Бугарија планира центар за одржување на оклопните борбени возила „Страјкер“

Бугарските вооружени сили ги примија првите склопени борбени возила „Страјкер“ за Копнените сили на церемонија во воениот завод „Терем-Ивајло“ во Велико Трново. Бугарските војници веќе се обучени за работа со возилата, а Министерството за одбрана работи Бугарија да стане регионален центар за нивно одржување.

Началникот на одбраната во оставка, адмирал Емил Ефтимов, оцени дека приемот на „Страјкер“ е важна фаза во модернизацијата на бугарската армија и во стратегиското партнерство со САД и Канада.

„Во услови на сериозни предизвици за европската безбедност, вклучително и војната во Украина која сè уште трае, изградбата на борбено способни копнени формации е критична неопходност“, рече Ефтимов.

Според него, новите возила ќе обезбедат поголема маневрирачка способност, современа заштита и повисока огнена моќ. Тој додаде дека перспективата „Терем-Ивајло“ да стане регионален центар за одржување на „Страјкер“ би ѝ овозможила на Бугарија да обезбедува услуги и за сојузниците во регионот.

Министерот за одбрана Димитар Стојанов изјави дека земјата има капацитет да развие и повисоко ниво на одржување на возилата.

„Имаме капацитет и можности, покрај првото и второто ниво, да го усвоиме и третото ниво на одржување на возилата ‘Страјкер’. Се надевам дека тоа ќе го направиме што е можно побрзо, но приоритет, се разбира, му давам на склопувањето на нашите возила“, рече Стојанов.

Тој потсети дека возила од семејството „Страјкер“ имаат и Република Северна Македонија и Украина.

За опремување на Втората механизирана бригада со истиот тип борбени возила ќе бидат потребни уште 1,4 милијарди евра и околу 200 возила во период од пет до шест години. Договорот за 61. Стрјамска механизирана бригада опфаќа 198 возила, од кои 183 се „Страјкер“, а останатите се логистички.

Стојанов рече дека испораките и плаќањата сега се одвиваат според распоредот, а дел од возилата може да бидат испорачани и пред рокот.

Бугарија засега не произведува муниција за „Страјкер“ и ја набавува од САД. Министерот изрази надеж за трансфер на технологии што би овозможил производство во земјата.

Во однос на борбата против дронови, Стојанов нагласи дека тоа е приоритет, но дека ниту еден систем не може да обезбеди стопроцентна ефикасност. Според него, покрај кинетички системи, во урбани услови се потребни и решенија за електронско војување.