Бугарите уапсени за шпионажа во корист на Русија се претставувале како новинари за следење цели во Лондон, Германија и Црна Гора

Тројцата Бугари уапсени под сомнение за шпионажа во корист на Русија се претставувале како новинари за да следат цели во Лондон и Европа, пишува Дејли мејл.

Орлин Русев, Бисер Џамбазов и Катрин Иванова се меѓу петте лица уапсени во февруари според Законот за службени тајни на Велика Британија по претресите на нивните имоти во Лондон и Грејт Јармут во Норфолк. МИ5 разузнавачките информации ги предала на полицијата.

Тие се обвинети според Законот за британски документи за поседување 19 лажни документи со „незаконска намера“, вклучувајќи пасоши, лични карти и документи на Велика Британија, Бугарија, Италија, Шпанија, Франција, Хрватска, Словенија, Грција и Чешката Република.

Според последните извештаи, тројцата се претставувале за новинари од американски телевизиски компании, откако Скотланд Јард открил лажни прес-картички на каналите Discovery и National Geographic, објави Тајмс.

Се верува дека операцијата за фалсификување документи, која имала за цел да следи цели во Лондон, Германија и Црна Гора, ја водел Русев (45) од гостинска куќа во Норфолк. Се вели дека истражителите пронашле опрема за правење лажни документи во неговата соба.

Според Телеграф, Бугарите, кои чекаат судење следната година, биле поврзани и со стан во северозападен Лондон, кој се наоѓа на километар од воената база РАФ Нортолт. Базата често ја користeле министри, шефови на странски држави и членови на кралското семејство.

Тројцата Бугари обвинети како дел од истрагата за националната безбедност биле во Британија неколку години и живееле во различни предградија, работејќи на различни места.

Се вели дека Русев, од Грејт Јармут, Норфолк, имал деловни контакти во Русија. Според неговиот профил на Linkedin, тој се преселил во Велика Британија во 2009 година и работел во телекомуникацискиот сектор. На страницата се тврди и дека еднаш го консултирал бугарското Министерство за енергетика. Се верува дека тој е уапсен во гостинска куќа покрај море, сопственост на бугарска бизнисменка.

Соседите велат дека полицијата подигнала шатор пред хотелот со три ѕвезди Хајди во Грејт Јармут кога Русев бил приведен.

Џамбазов (41) и Иванова (31) од Хароу, северозападен Лондон, раководеле со јавна група која им помагала на Бугарите да се интегрираат во „културата и нормите“ на британското општество. Соседите велат дека двајцата биле популарни личности на локално ниво и им делеле колачи и пити на луѓето што живееле во близина. Двојката работела и во изборните комисии во главниот град, кои им помагале на Бугарите кои живеат во странство да гласаат во својата татковина. Според нивните профили на социјалните мрежи, Џамбазов работел како возач во болница, а Иванова била лаборант во приватен здравствен бизнис.

Соседите велат парот имал љубовна афера и додаваат дека останале шокирани кога дознале дека тие се уапсени.

Џамбазов и Иванова, остануваат под истрага.

На Русев, Џамбазов и Иванова во јануари ќе им се суди во Лондон за кривични дела поврзани со документи за идентификација. Тие се уште немаат дадено изјави за обвиненијата.