Бугарски и ерменски фолклор на заедничка сцена во Пловдив
На 13 септември 2026 година, во Античкиот театар во Пловдив ќе се одржи спектаклот „Два дома – Бугарско-ерменски културен мост“, кој за првпат на иста сцена ќе ги обедини Државниот танцов ансамбл на Ерменија и бугарскиот фолклорен ансамбл „Тракија“, јавува 24 часа.
Во програмата ќе настапат 100 изведувачи, кои преку музика, танц, носии и традиции ќе го претстават културното наследство на Бугарија и Ерменија. Настапот ќе биде и прво гостување на Државниот танцов ансамбл на Ерменија во Бугарија.
Настанот е кулминација на одбележувањето на 120-годишнината од основањето на Општоерменскиот добротворен сојуз „Парекордзаган“ (AGBU), основан во 1906 година.
Средствата од спектаклот ќе бидат наменети за поддршка на учеството на деца и млади во културни и образовни програми во Бугарија и Ерменија. Настанот ќе биде и професионално снимен и објавен на платформата twohomes.bg.
