Бугарското училиште „Родољубие“ во Синсинати ги пречекува учениците 17-та година по ред

Бугарското неделно училиште „Родољубие“ во американскиот град Синсинати ќе ги пречека своите ученици седумнаесетта година по ред, соопштија од образовната установа на својата Фејсбук-страница, јавува БНР.
Новата учебна година ќе биде отворена на 12 септември со настан со физичко присуство на Northern Kentucky University и онлајн преку платформата Google Classroom.

„Училиштето ‘Родољубие’, заедно со Асоцијацијата на Бугарите во Синсинати, неуморно работи на изучување и зачувување на бугарскиот јазик, култура и историја. Со радост ве покануваме да ја споделите со нас возбудата на децата и наставниците и повторно заедно да тргнеме по патот на знаењето на нашиот јазик! Училишното ѕвонче на училиштето ‘Родољубие’ ѕвони за сите нас! Ве очекуваме!“, се наведува во поканата упатена до учениците, наставниците, родителите и пријателите на бугарското училиште. Во неа, училишниот тим повикува училниците – реални и виртуелни, повторно да оживеат со смеа, идеи и соништа.

Бугарското неделно училиште „Родољубие“ во Синсинати ги отвора своите врати во 2010 година при Асоцијацијата на Бугарите во Синсинати, со цел зачувување на бугарското јазично и културно наследство и развивање на јазичните вештини на децата по бугарски јазик. Образовниот центар е вклучен во Списокот на бугарските неделни училишта во странство на бугарското Министерство за образование и наука. Тој е и лиценциран испитен центар и подготвува ученици за полагање на испитот за Печат за двојазичност при Департманот за јазична настава на Софискиот универзитет „Св. Климент Охридски“.