Генерал-мајор Ворнер Рос од Националната гарда на Тенеси одликуван од бугарското Министерство за одбрана

Командантот на Националната гарда на американската сојузна држава Тенеси, генерал-мајор Ворнер Рос, вчера беше одликуван со Почесен знак на Министерството за одбрана на Бугарија од прв степен. Одликувањето му го врачи началникот на одбраната, адмирал Емил Ефтимов.

Наградата му е доделена на Рос „за исклучителниот личен придонес во зацврстувањето и доследниот развој на стратегиското воено партнерство меѓу Република Бугарија и Националната гарда на сојузната држава Тенеси“.

Од бугарското Министерство за одбрана посочуваат дека одликувањето е признание за придонесот во развојот на билатералната воена соработка во одржливо, динамично и практично ориентирано партнерство со значителна додадена вредност за бугарските вооружени сили.

Посебно се истакнува напредокот во развојот на одбранбените способности, воената обука и образование и кибербезбедноста, како и јакнењето на меѓусебната доверба и продлабочувањето на соработката меѓу вооружените сили на Бугарија и САД.

При врачувањето на одликувањето, адмирал Ефтимов му изразил благодарност на генерал-мајор Рос за неговите активни напори во постигнувањето на сегашното ниво на интензивна и добро координирана воена соработка.

Ефтимов изразил уверување дека партнерството со Тенеси, кое трае веќе 33 години, ја докажало својата ефикасност и има значителен потенцијал за натамошно проширување на заедничките иницијативи во билатералната подготовка, различните форми на обука и размената на искуства.

Бугарија е меѓу првите 13 држави, од вкупно 92, вклучени во Програмата за партнерство меѓу американски сојузни држави и странски земји.

Партнерството меѓу бугарското Министерство за одбрана и Националната гарда на Тенеси започна во 1993 година по иницијатива на Националното биро на Гардата на САД и се развива како дел од билатералната воена соработка меѓу Бугарија и Соединетите Американски Држави.

Соработката опфаќа билатерални и мултинационални обуки во Бугарија и во странство, како и хуманитарна поддршка во различни делови од земјата. Тенеси е избран за партнерска сојузна држава поради релативните сличности со Бугарија во однос на големината, климата и бројот на население.