Грбав кит заглавен во река во Бретања го најде патот до морето

Грбав кит заробен од четвртокот на устието на река во Бретања, западна Франција, успеал да се врати во морето, соопшти Здружението одговорно за спасување животни таму.

Кит од седум до десет метри успеал да ја помине браната што го спречува да се врати во морето.

„Го нема, го нема“, среќно извикуваа спасувачите и неколку десетици набљудувачи на браната на електраната во Ранс, гледајќи го китот во океанот.

Китот се заглавил во четвртокот наутро. Влегол во реката бидејќи главната брана на централата била отворена.

Тој се бореше повторно да се врати на отворено море и покрај интервенцијата на спасувачите и повторното отворање на капијата.

Огромниот цицач, благодарение на плимата и осеката што паѓа, и сите отворени брани, успеа да помине една од нив и да се врати во океанот.