Хиновски: Бугарија има право да ги одредува таксите, нема основа за обесштетување за РС Македонија

Неосновани се претензиите на Република Северна Македонија кон Бугарија за таксите на рускиот природен гас. Бугарија како суверена држава има целосно право да наметнува такви такси. Ова во интервју за БГНЕС го изјави експертот за енергија Иван Хиновски, претседател на Бугарскиот форум за енергетика и рударство (БЕМФ), пренесува Фактор.

На 26 октомври, македонскиот министер за економија Крешник Бектеши рече дека Скопје ќе бара компензација од Софија, ако биде воведен, како што рече, „вонреден данок на енергија“. Иван Хиновски коментира дали македонските тврдења се основани.

„Скопје може да бара обесштетување, но нема да го добие, бидејќи тоа е суверено право на секоја земја – да си ги одредува политиките за акцизите и таксите“, категоричен е експертот.

Тој објасни дека не се работи за транзитна такса, која е вклучена во транзитниот договор со „Гаспром експорт“, туку за акциза на „транзит“ услугата во „Турски поток“, која Бугарија има право да ја наметне.

„Во почетокот идејата на оваа акциза е да се земе од Гаспром експорт“, рече Хиновски, додавајќи дека идејата на овој чекор е да се казни Гаспром за политиката кон Бугарија.

БГНЕС потсетува дека од 13 октомври на сила е такса од 20 лева/MWh. Станува збор за увоз и транзит на руско „сино гориво“. Парламентот ги усвои измените на Законот за контрола на спроведувањето на рестриктивните мерки во поглед на дејствијата на Русија кои ја дестабилизираат ситуацијата во Украина. Објавени се во Државниот весник.

Одлуката предизвика бурна реакција во Србија и Унгарија, кои си дозволија да и се закануваат на Бугарија, велејќи дека нема да ја остават оваа „непријателска бугарска одлука“ без соодветен одговор.

Српскиот претседател Александар Вучиќ на 15 октомври побара да се разговара со Румен Радев во врска со одлуката за зголемување на транзитните такси. Србија увезува руски природен гас од Бугарија преку „Балкански тек“, кој е продолжение на „Турски поток“. Цевката е во сопственост на бугарската држава.

Претседателот Румен Радев на 26 октомври ја упати воведената такса до Уставниот суд. Во барањето до Уставниот суд тој наведува дека се прекршени голем број одредби содржани во бугарскиот устав.

Истиот ден, неговиот став беше остро критикуван од министерот за финансии Асен Василев и премиерот Николај Денков, кои го обвинија дека постапките на Радев се против интересите на Бугарија и го штитат Гаспром.

На 30 октомври, портпаролот на Европската комисија, Тим Мекфиj, потврди дека Бугарија има право да одлучува како ќе располага со приходите од транзитните такси врз рускиот гас.