Избрани се изведувачите за модернизацијата на два железнички проекта од Коридор VIII
Националната компанија „Железничка инфраструктура“ на Бугарија ги заврши постапките за избор на изведувачи за проектите за модернизација на железничките делници Софија – Перник – Радомир и Ѓуешево – граница со Република Северна Македонија. Двата проекта се дел од Коридор VIII и имаат значење за обновување на железничката мрежа и зајакнување на регионалната поврзаност меѓу Црното и Јадранското Море.
За проектот „Модернизација на железничката линија Софија – Перник – Радомир, делница Перник – Радомир“ на прво место е рангиран конзорциумот ДЗЗД „ИСПА“, со договорна вредност од 421.283.219 лева без ДДВ. Проектот предвидува изградба на двоколосечна линија за брзини до 160 км/ч, модернизација на станиците и целосно укинување на вкрстувањата на исто ниво со патниот и пешачкиот сообраќај. Рокот за реализација е до средината на 2029 година.
За модернизацијата на железничката делница Ѓуешево – граница со Република Северна Македонија, на прво место е класифициран конзорциумот ДЗЗД „ЃУЕШЕВО 2025“, со договорна цена од 97.972.691,73 лева без ДДВ. Проектот опфаќа проектирање и изградба на недостасувачките 2,4 километри железничка линија до границата, како и реконструкција на колосечниот развој и приемната зграда на железничката станица Ѓуешево. Завршувањето е планирано до крајот на 2028 година.
