Романот „Градинарот и смртта“ на Георги Господинов меѓу најзначајните книги за 2025 година
Романот „Градинарот и смртта“ на Георги Господинов е вклучен меѓу десетте најважни романи за 2025 година, според класација објавена од германскиот национален дневен весник „Франкфуртер алгемајне цајтунг“, јавува БТА.
Весникот ја опишува книгата како мемоар, исповед и лична временска слика, оценувајќи ја како најинтимниот роман на авторот досега. Делото ја раскажува приказната за болеста и смртта на таткото на писателот, претставена со нежност и смиреност.
Рецензентката Сандра Кегел истакнува дека Господинов користи хумор и анегдоти како начин да се справи со тагата, при што тие стануваат противтежа на болката. Таа нагласува дека авторот никогаш досега не понудил толку длабок и трогателен увид во својата лична внатрешност.
Во истата класација за 2025 година се вклучени и дела од автори како Јонас Лишер, Кристине Вунике, Доротее Елмигер и Томас Пинчон, наведува „Франкфуртер алгемајне цајтунг“.
