Кои се членовите на комисијата што ќе ги „чешла“ историјата и образованието меѓу Македонија и Бугарија?
Македонија и Бугарија ги формираа комисиите што ќе работат на решавање прашањата од историски и образовен карактер, обврска што произлегува од Договорот за добрососедство и соработка меѓу двете земји.
Претседател односно координатор на македонскиот тим е академик д-р Драги Ѓорѓиев, член на МАНУ и професор на Институтот за национална историја (ИНИ) на УКИМ, а членуваат и професорите од ИНИ – Ванчо Ѓорѓиев, Петар Тодоров, Дарко Стојанов, како и историчарот Александар Литовски од Националната установа Завод и музеј – Битола. Членови на Комисијата се и професорката Љубица Спасовска, научен соработник на Универзитетот во Ексетер, Велика Британија и Љупчо Ристески – антрополог, професор на Институтот за
етнологија и антропологија на УКИМ.
Од Бугарија претседател на комисијата е Ангел Димитров – првиот бугарски амбасадор во Македонија (од 1994 до 2001 година), а негов заменик е историчарот Наум Кајчев, професор по современа историја на Софискиот Универзитет „Св. Климент Охридски“ и поранешен генерален конзул во Битола и Торонто.
Членови се д-р Момчил Методиев – главен уредник на изданието „Вера и општество“, поранешен дипломатски службеник во Министерство за надворешни работи, доктор по историја, истражувач на историјата на Бугарската православна црква; професорот Иван Илчев – поранешен ректор на Софискиот универзитет (од 2007 до 2015 година) и професор по најновата историја на балканските народи; доцент Даниел Вачков – директор на Институтот за историски истражувања при Бугарската академија на науките (БАН); професор Филип Топалов – амбасадор во Ватикан; и доцент Бони Петрунова, археолог и директор на Националниот историски музеј.
Извор: еМагазин
