КОНТРОЛОР НА ДУРМО ТУРС ДОБИ УСЛОВНА КАЗНА ВО ИЗДВОЕНА ПОСТАПКА ЗА НЕСРЕЌАТА КАЈ ЛАСКАРЦИ
Обвинет во издвоена постапка за несреќата кај Ласкарци кон средината на октомври призна вина пред судот и доби условна казна затвор од 2 години, ако во наредните 5 не го повтори делото како и забрана за работа од пет години.
Судијката Славица Андреевска го осуди гостиварецот со иницијали В.Г. за несовесно работење, бидеќи, иако знаел дека дека има вграден уред за лажирање на брзината во автобусот на „Дурмо Турс“, издал потврда за извршена проверка.
Во образложението на пресудата пишува: „И покрај тоа што пломбата која го спречува неовластеното отварање на куќиштето на тахографскиот уред била оштетена и постоел вграден уред за манипулација на реалната брзина која ја бележи тахографот, обвинетиот издал потврда дека проверката е извршена“. Обвинетиот пополнил налепница, со што потврдил дека тахографот е исправен и одговара на пропишаните барања.
Во сообраќајната несреќа кај Ласкарци, загинаа 16 лица, а над 30 беа повредени. За овој настан кој ја вознемири и шокираше јавноста се води засебен судски процес.
