Легендарната Тарја Турунен со два концерта во Бугарија во март 2027 година

Една од најпознатите фигури на светската метал сцена, Тарја Турунен, ќе одржи два концерта во Бугарија во март 2027 година. На 14 март ќе настапи во Дворецот на културата и спортот во Варна, а на 18 март во салата „Христо Ботев“ во Софија, соопштија организаторите од Sofia Music Enterprises, пренесува Актуално.

Концертите се дел од турнејата за нејзиниот десетти студиски албум „Frisson Noir“, објавен на 12 јуни 2026 година преку earMUSIC. Албумот, кој Турунен го опишува како најтежок во нејзината соло кариера, претставува враќање кон метал корените и ја спојува симфоничната оркестрација со моќен метал звук.

На концертите во Варна и Софија, Тарја со својот бенд ќе изведе песни од „Frisson Noir“, композиции од соло кариерата, како и препознатливи песни од периодот со Nightwish. Публиката ќе може да види и две специјални предгрупи, чии имиња ќе бидат објавени дополнително.

Билетите се достапни преку Eventim и Bilet.bg. Цените за Варна се од 30 до 60 евра, додека за Софија билетите чинат од 35 до 60 евра, во зависност од периодот на купување. Деца до 7 години влегуваат бесплатно, без право на посебно седечко место и задолжително со придружник.