МНР на Бугарија: Мицкоски ја оддалечува РСМ од ЕУ, нема да има промена на бугарската позиција
Денешните изјави на премиерот на Република Северна Македонија, за жал, уште еднаш отворено ја доведуваат во прашање европската перспектива на неговата земја. Ова се наведува во позиција на Министерството за надворешни работи на Бугарија, јавува БГНЕС.
„На властодршците во Скопје треба да им биде јасно дека обидите за повторно преговарање на меѓународните обврски кои веќе се преземени може да доведат само до дополнително оддалечување од почетокот на преговорите за членство во ЕУ“, нагласуваат бугарското МНР.
„Оваа наша позиција нема да се смени без разлика дали станува збор за преодна или редовна влада. Потсетуваме дека како резултат на непотребни провокации и конфронтации со соседните земји, Северна Македонија веќе изгуби премногу време во процесот на отворање на пристапните преговори“, категорично наведуваат од МНР на Бугарија.
„Официјалната влада на Република Бугарија е легитимна влада која ги има сите прерогативи за управување со државата.Таа останува отворена за дијалог со Северна Македонија, а во исто време нагласуваме дека, без разлика дали диалогот се води со службена или редовна бугарска влада, истиот не вклучува повторно преговарање на веќе преземените обврски од Скопје“, децидни се од бугарското МНР.
Министерството за надворешни работи повторува дека европскиот консензус од летото 2022 година меѓу 27-те земји-членки на ЕУ и Северна Македонија целосно ги оцртува сите чекори за постигнување вистински напредок во процесот на европска интеграција на оваа земја.
„Бугарската позиција е јасно наведена во Одлуката на Народното собрание од 24 јуни 2022 година, поддржана од сите политички сили. Тоа е израз на волјата на бугарските граѓани да ја поддржат Северна Македонија во процесот на исполнување на критериумите за членство во ЕУ, под услов соседната земја да се придржува до највисоките стандарди во областа на човековите права и да ги исполни преземените меѓународни обврски. Овој став нема да се менува“, соопшти МНР на Бугарија.
