Ново трасе на автопатот „Струма“ во Бугарија кон Грција со два тунела и 17 вијадукти

Агенцијата „Патна инфраструктура“ (АПИ) планира новото трасе на автопатот „Струма“ во правец Софија–Кулата да минува источно од Кресненската Клисура, со две нови тунелски цевки и 17 вијадукти. Инвестицискиот предлог е објавен од бугарското Министерство за животна средина на 1 октомври и претставува почеток на еколошката постапка за проектот, пренесува Пиринско.

Главниот нов дел од трасата ќе биде долг околу 23,3 километри, од клучката „Симитли – Исток“ до обиколницата на Кресна. Предвидената проектна брзина е 80 километри на час, а во првите околу осум километри ќе има и дополнителна лента за бавни возила поради поголемиот наклон.

Планирана е изградба на нова западна цевка на тунелот „Симитли“, долга 222 метри, и нова источна цевка на тунелот „Тисата“, долга околу 1,4 километри. За дел од трасата ќе се користат и веќе проектирани тунелски цевки кај „Ракитна“, „Стара Кресна“ и „Света Недела“.

Проектот предвидува и 17 вијадукти со вкупна должина од околу 7,7 километри, што значи дека приближно една третина од новиот дел ќе минува по големи мостовски конструкции. Најдолгиот вијадукт ќе биде 1,315 километри.

Новото трасе ќе зафати околу 25,5 хектари површина. Според инвестициското известување, тоа нема директно да навлегува во заштитените територии во Кресненската Клисура, но ќе минува низ заштитените подрачја „Кресна–Илинденци“ и „Кресна“ од мрежата „Натура 2000“.

АПИ побарала за проектот директно да биде спроведена задолжителна оцена на влијанието врз животната средина. По изградбата на новото трасе, сегашниот пат Е79 низ Кресненската Клисура треба да остане локален пат, а транзитниот сообраќај да биде целосно изведен надвор од клисурата.