Обвинителката го охрабри Жан Митрев да даде гаранција ако не сака да му бидат блокирани сметките

Обвинителката Искра Хаџивасилева, денес, по одложеното прво рочиште за судењето на Жан Митрев, го охрабри кардиохиругот да даде гаранција со која ќе се обезбедат побарувањата на оштетените доколку не сака да му бидат блокирани сметките. Клиничката болница „Жан Митрев“ денес соопшти дека Кривичниот суд им ги блокирал сметките ден пред првото рочиште.

„Ова е нешто тоа трае подолго време, не е претензија да се блокира работата на болница. Се раководевме од начелата и стандардите на пропорционалност и неопходност. Имате, од едната страна, интерес на оштетени, имотно-правно побарување, кое е предјавено. Јас чувствувам обврска да го заштитам тоа, но повторено е неколкупати, како и денес, дека одбраната може да понуди износ како гаранција за побарувањето и тоа е нешто што Обвинителството и тоа како ќе го цени и дури и го охрабрува“, рече обвинителката Хаџивасилева.

Блокирање на сметките Обвинителството предложило пред повеќе од три месеци, а судот вчера одлучил да се замрзнат сметките по она што е последна состојба.

Обвинителката Хаџивасилева даде коментар и на реакциите за судењето.

„Реакции има, некакви небулози, па и некакви изјави за хајки. Јас не можам да знам за такво нешто, можам да кажам дека Обвинителството работи врз основа на факти и прибира доказен материјал, кој потоа го анализира. Овој предмет е почнат по допрен глас врз основа на новинарско истражување и не само тоа, туку однапред беше јасно дека постоеле и претходно пријави од многу лица, што биле доставувани до Лекарската комора и до невладини здруженија. Обвинителството собираше докази, од доказите утврди некаква фактичка состојба и поднесе обвинение бидејќи сметаше дека основаното сомневање е потврдено од доказите. Тоа се објективните работи, а какво е субјективното чувство на обвинетиот – не знам“, рече обвинителката Хаџивасилева.

На денешното рочиште новиот правен тим на Жан Митрев доби рок до 5 април да ја подготви одбраната. Жан Митрев и неговата клиника кои се товарат за измама оти ги држеле во заблуда пациентите со прикривање факти во однос на лекувањето од Ковид – 19 со хемофилтрации. Истрагата за Жан Митрев и неговата болница беше отворена по допрен глас откога Истражувачката репортерска лабораторија (ИРЛ) го објави истражувањето „Нечиста крв“ за пациентите на болницата, а Скопското јавно обвинителство во јануари годинава поднесе обвинение.