Патувачката изложба „Лавот – бугарскиот национален симбол во епохата на Преродбата“ ќе биде отворена во Рига

Патувачката изложба „Лавот – бугарскиот национален симбол во епохата на Преродбата“ ќе биде отворена на 28 февруари во Градскиот административен центар „NVO nams“ во Рига, Латвија. Информацијата ја соопшти Латвиско-бугарското културно друштво „Кирил и Методиј“ преку својата страница на Фејсбук, пренесува БТА.

Членката на Управниот одбор на бугарското здружение во Латвија, Искра Бонева, информира дека изложбата е продукција на Народната библиотека „Иван Вазов“ од Пловдив, а автор е Александар Ѓошев. Нејзиното гостување е организирано по повод одбележувањето на Денот на ослободувањето на Бугарија од османлиска власт – 3 март.

„Експозицијата опфаќа значајни фази од развојот на лавот како национален симбол на Бугарите во различни сфери за време на Преродбата – ликовна уметност, печатена графика, револуционерна активност, борба за независност, литература, книгораспространување и хералдичка практика“, изјави Бонева.

Таа додаде дека изложбата во моментов е претставена само на бугарски јазик, но друштвото планира да ја преведе на латвиски и на англиски јазик со цел да стане достапна за поширока публика и подобро да ја претстави бугарската хералдичка традиција.

„Секој што сака да соработува и да учествува во проектот за превод на изложбата може да се обрати до нашето друштво. Подготвените преводи ќе им бидат од корист и на децата при подготовка на училишни проекти“, посочи Бонева.

Изложбата ќе остане поставена во Рига до 28 март.