|

Петровска на состанокот на Северноатлантскиот совет на министри за одбрана во Брисел

Министерката за одбрана Славјанка Петровска денеска во седиштето на НАТО во Брисел ќе учествува на серија состаноци на Северноатлантскиот совет на ниво министри за одбрана, вклучувајќи го и состанокот на Советот НАТО – Украина, а заедно со министрите за одбрана на единаесет сојузнички земји, меѓу кои Германија, Турција, Холандија, Полска, Данска, како и Шведска како земја-поканета за членство ќе потпише и Писмо за намери за „Зголемување на производствените капацитети на муниција и индустриска отпорност“ преку НАТО Мултинационалната Иницијатива за набавки (муниција), под покровителство на Обединетото Кралство.

На состаноците во седиштето на НАТО ќе се разговара за безбедноста на евро-атлантската област, за подготовките за претстојниот Лидерски самит во Вашингтон на кој ќе се одбележи 75-годишнината од основањето на НАТО, инвестирањето во одбраната од страна на земјите-членки, зацврстувањето на колективната одбрана и одвраќање, како и поддршката за Украина.

Вчера во Брисел, министерката Петровска го потпиша Договорот за придонес во Одделот за јавна дипломатија на НАТО кој овозможува експерти од областа на стратешките комуникации и односи со јавноста во Министерството да дадат свој придонес кон развојот на областа во рамките на НАТО – Алијансата.

Слични Објави