Почнуваат чествувањата по повод 230-та годишнина од раѓањето на големиот бугарски преродбеник и просветител од Банско Неофит Рилски

Во Банско започнуваат Националните чeствувања по повод 230-та годишнина од раѓањето на бугарскиот преродбеник и просветител Неофит Рилски. Чествувањата се во организација на општина Банско, Југозападниот универзитет „Неофит Рилски“ во Благоевград, Неврокопската митрополија, Рилскиот манастир, Музејскиот комплекс – Банско, читалиште “ Никола Вапцаров – 1894“ Банско и општините Благоевград, Ќустендил, Самоков, Габрово, Копривштица, Сандански и Казанлък.

Дводневната програма започнува со студентско-докторски семинар „Личности, институции, традиции во образованието и духовноста“ од 14:00 часот на 15 септември во свечената сала на читалиштето „Никола Вапцаров“. Неофитските читања ќе продолжат на 16 септември во 11:30 часот во истата сала на читалиштето.

Во 17 часот и 30 минути денеска во фоајето на читалиштето „Никола Вапцаров“ ќе биде отворена изложбата „Неофит Рилски – свештеник, книгописец, просветител, основоположник на новото бугарско образование“.

Во 18 часот и 30 минути во големата сала на читалиштето започнува театарската претстава „Од корен до врв“, подготвена од театарската група кон читалиштето „Никола Вапцаров – 1894 година“ во чест на првиот учител Неофит Рилски.

Чествувањето ќе продолжи во недела, на 16 септември, од 08:30 часот со Света литургија во црквата „Света Троица“, а во 11:00 часот ќе бидат положени венци и свежо цвеќе пред бистата-споменик на патријархот на бугарските учители во куќата- музеј „Неофит Рилски“.

Никола Бенин, како што е светското име на отецот Неофит Рилски, е роден во 1793 година во Банско. Во 1806 година пристигнал во Рилската света обител заедно со неговиот близок пријател Димитар Молеров – син на основачот на Банската зографската школа, Тома Вишанов.

Во 1811 година, Никола Бенин го прифатил монаштвото во Рилскиот манастир под името Неофит. Седум години подоцна го прифатил и јеромонашкиот сан. Заслугите на отец Неофит Рилски за бугарското просветно дело се огромни, за што сведочат неговите зачувани дела во Рилскиот манастир, од кои дел може да се видат во Црковно-историскиот музеј кон манастирот. Меѓу нив се првиот глобус создаден од отец Неофит Рилски во 1836 година, првата бугарска граматика, табелите засновани на методот на меѓусебно учење, кој го совладал во 1834 година во Букурешт и неколку години подоцна го применил во бугарското образование. Неофит Рилски го превел Новиот завет, објавен во Измир во 1840 година, чуван во манастирската библиотека и кој бил преобјавуван пет пати, преведувал и световна литература. Значаен придонес на Неофит Рилски во образованието е воведувањето на методот Бел-Ланкастер во бугарските училишта.

Во последните 30 години од својот животен век, Неофит Рилски живеел во Рилскиот манастир. Последните четири години од животот отец Неофит Рилски ги поминал повлечен, во мир, молитва и пост. Гробот на отец Неофит Рилски се наоѓа во близина на јужниот ѕид на соборниот храм на Рилскиот манастир.