ПРОМОЦИЈА НА КНИГАТА „ТЕЛОТО ВО КОЕ ТРЕБА ДА СЕ ЖИВЕЕ“ ОД ПЕТАР АНДОНОВСКИ ВО СОФИЈА

На сцената на културната програма на манифестацијата Алеја на книгата во Софија, Македонскиот културен центар во Софија попладнево ќе го промовира романот „Телото во кое треба да се живее“ од македонскиот писател Петар Андоновски, во превод на бугарски јазик. Романот „Телото во кое треба да се живее“, кој е добитник на наградата „Роман на годината“ во земјава, е второ дело од македонскиот писател преведено на бугарски јазик. Претходно во издание на „Персеј“ на бугарски јазик беше преведено неговото дело „Очи со боја на чевли“, а наскоро на бугарски јазик ќе излезе и неговата трета книга „Страв од варвари“ за која Андоновски ја доби Наградата за литература на Европската унија за 2020 година.