СДСМ: ВМРО-ДПМНЕ АПСЕШЕ НОВИНАРИ И ЗАТВОРАШЕ МЕДИУМИ

Ниту едно лицемерно соопштение од белиот дворец нема да го смени фактот дека 11 години нашата држава беше заробена и се наоѓаше на дното во Европа по медиумски и новинарски слободи, велат од владејачкиот СДСМ како реакција на соопштението со кое од ВМРО-ДПМНЕ повикаа новинарите да не подлегнуваат на притисоците од Заев.

Од СДСМ порачуваат дека ништо не може да го избрише фактот оти, како што велат, 11 години ВМРО-ДПМНЕ апсела, тепала, притворала новинари и затворала медиуми.

„Јавноста, граѓаните и новинарите многу добро знаат кој ја злоупотреби полицијата за упад во приватна телевизија, кој поттикнуваше физички напади на новинари, кој ставаше во затвор новинари, кој поттикуваше да се испраќаат посмртни венци на домашни адреси на новинари“, се наведува во партиското соопштение во кое се додава дека денеска медиумите се дел од сите легислативни процеси кои се однесуваат на нив.