| |

Трамп размислува за ангажман на приватни воени компании во Украина

Вести, Истакнато, По надвор

Американскиот претседател Доналд Трамп води разговори со европски сојузници за можноста американски приватни воени компании (ПВК) да се вклучат во операции во Украина, објави британскиот весник „Телеграф“, на кој се повикува агенцијата УНИАН, пренесува БГНЕС.

Според планот, ПВК би изградиле бази и би ги заштитувале американските интереси во земјата. Овој пристап се разгледува како компромис по изјавата на Трамп дека редовни американски војници нема да бидат испратени во Украина. Извор од британската влада оценува дека ПВК на практика би претставувале „американска чизма“ во Украина – фактор што само по себе би делувал одвраќачки кон Кремљ.

Присуството на ПВК треба да испрати сигнал до Москва дека секој напад врз нив може да предизвика одговор од САД. Европски претставници сметаат дека тоа би можело да ја засили одвраќачката моќ, а истовремено да ја намали внатрешната опозиција во САД против „странска интервенција“.

Разговорите се дел од пошироки напори за обезбедување гаранции за безбедност на Украина, во кои Велика Британија и Франција имаат водечка улога. Меѓу разгледуваните опции се:

  • создавање на тампон-зона меѓу Украина и Русија,
  • распоредување на до 30.000 европски војници,
  • воздушни патроли за одржување на украинските аеродроми во функција,
  • формирање на црноморска оперативна група предводена од Турција за заштита на бродскиот сообраќај.

„Главната цел е да им се покаже на Украинците дека ќе се бориме со вас доколку Русија повторно изврши инвазија“, изјавил еден западен службеник.

Иако САД засега не се подготвени да испратат сопствени војници, Вашингтон се обврзал да обезбеди логистика и тешки транспортни авиони, да ја поддржи Украина со современо оружје (Patriot, HIMARS, крстосувачки ракети ERAM), како и да даде сателитско разузнавање што ѝ недостига на Европа.

Координацијата на мисијата најверојатно би била ставена под команда на американски генерал, а како можен кандидат се споменува врховниот командант на НАТО, генерал Алексус Гринкевич.

Слични Објави