Туск: Европа е обединета против руската окупација на украинските територии

Полскиот премиер Доналд Туск изјави дека Европа е обединета во одбивањето на руската окупација на украинските територии и дека „државните граници не можат да се менуваат со сила“. Тој додаде дека позицијата на европските земји е јасна и во контекст на претстојните преговори меѓу претседателот Трамп и Путин.

„Свесни сме дека заканата од Русија е сериозна и дека дури и ако почетокот на вистински преговори меѓу Русија и Украина може да ја промени ситуацијата во самата Украина, тоа сигурно нема да ја промени општата оценка на руската политика во нашиот регион,“ рече Туск, нагласувајќи дека војната во Украина не смее да му користи на агресорот.

За време на посетата на фабриката за експлозиви „Нитро-Хем“ во Бидгошч, тој предупреди на можен голем конфликт во 2027 година, повикувајќи на целосна одбранбена подготвеност на Полска, НАТО и Европската Унија: „Мораме да бидеме подготвени пред 2027 година за сите можни околности… Без оглед на украинската сцена, Полска, НАТО и Европската Унија мора да бидат заедно подготвени за можни закани или акти на агресија од исток.“

Туск нагласи дека нема точка во времето кога ќе може да се каже дека подготовките и вооружувањето се непотребни: „Ништо не почнува и ништо не завршува во 2027 година… Нема датум од кој ќе можеме да кажеме дека сега е свет мир, можеме да ги скрстиме рацете, не треба да се подготвуваме, не треба да се вооружуваме, не треба да се модернизираме.“

Вицепремиерот и министер за одбрана Владислав Кошњак-Камиш изјави дека новата влада планира полската армија да има над 300.000 војници, а со резервистите – околу половина милион луѓе под оружје, благодарение на новите програми за обука.