Украина стана светски лидер во дрон-технологиите, изјави специјалниот пратеник на Трамп

Украина се издигна како глобален лидер во областа на дрон-технологиите, надминувајќи ги дури и Соединетите Американски Држави. Ова го изјави специјалниот пратеник на американскиот претседател Доналд Трамп за Украина, генерал Кит Келог, на форумот Yalta European Strategy (YES) во Киев, јавува БГНЕС.

Келог пристигна во украинската престолнина на 11 септември во рамки на официјална посета. „Украина веќе е светски лидер во одбранбените технологии. Тоа само по себе е доволен аргумент за нејзино членство во Европската Унија,“ нагласи тој. Според него, дроновите целосно го сменија карактерот на војната, а САД и другите држави значително заостануваат. „Американците сме назад… многу држави заостануваат, а Украинците правилно ја согледаа важноста на овие технологии и станаа лидери во светот. Но времето ни истекува брзо,“ предупреди Келог.

Американскиот генерал истакна дека за Вашингтон е клучно да изгради партнерство со Киев за размена на технологии во оваа сфера. По почетокот на целосната руска инвазија во 2022 година, Украина го прошири производството на дронови по копно, воздух и море, а планира во 2025 година да произведе 30.000 далекусежни беспилотни летала. Во јули претседателот Володимир Зеленски најави дека постигнал договор со Трамп за продажба на украински дронови на САД во вредност меѓу 10 и 30 милијарди долари. Дополнително, потпишан е и голем договор со американската компанија Swift Beat за заедничко производство на стотици илјади дронови уште оваа година.

Коментирајќи ја ситуацијата на фронтот, Келог изјави дека Русија „всушност губи“ и дека ограничените придобивки во Донбас се далеку од вистинска победа. „Ако придвижување со метри, а не километри, се смета за успех, тогаш добро. Но цената за Русија е огромна и тоа не се согледува доволно,“ рече тој.

Генералот додаде дека Москва е премногу зависна од Кина и ја оцени како „помал партнер“ во нивниот сојуз. „Ако Пекинг ја прекине поддршката денес, војната ќе заврши утре,“ потенцираше Келог.

За време на форумот, претседателот Зеленски лично му се заблагодари на американскиот пратеник за неговите напори во поддршка на Украина: „Секојпат кога сте тука, генерале, можеме да спиеме малку поспокојно. Би сакале да патувате во сите украински градови.“