(Видео) Бугарското државно знаме гордо се развеа во Чикаго по повод Трети март

Бугарскoто државно знаме и оваа година се развеа во Чикаго по повод националниот празник на Република Бугарија 3-ти Март. Настанот собра многу Бугари кои не ги забораваат своите корени, јавува бугарскиот медиум BGVoice. Церемонијата се одржа на „Дејли плаза“ во самото срце на Чикаго и понуди впечатлива свеченост.

Знамето беше свечено подигнато од д-р Илијана Димитрова, предавач во катедрата по бугаристика на Универзитетот на Илиноис Урбана-Шампејн, која беше обновена минатата година. Знамето беше внесено од мажите и жените од Бугарско-американската полициска асоцијација, што веќе се претвори во традиција. Бугарскиот државен симбол се издигна во небото над Чикаго под звуците на бугарската химна во изведба на Џулија Арагон.

„Нашата слобода е извојувана со многу жртвена крв, а нашата иднина – таа секогаш зависи од нас“, изјави во своето обраќање генералниот конзул на Бугарија во Чикаго Светослав Станков. „Денес нашата борба е поинаква. Таа е духовна. Просветителска. Културна. Нејзината главна цел е зачувувањето на бугарскиот јазик – столб на нашиот идентитет.“

Во 2025 година студиската програма „Бугаристика“ беше обновена на Универзитетот на Илиноис во Урбана-Шампејн – еден од најпрестижните универзитети во светот. Таму учат десетици деца од бугарската емиграција.

„Горд сум што можам да истакнам дека уште во првата година бугарскиот јазик стана трет најпосакуван меѓу повеќе од десетте јазици што се предаваат на Факултетот за славистика“, нагласи Станков. „Но за една заедница да биде силна, таа мора да биде видлива. Таа мора да биде почитувана. А почитта не се добива по право – таа се гради преку дијалог, преку партнерство и преку активно присуство во општествениот живот. Важно е бугарската заедница достоинствено да биде претставена пред локалните политички и општествени лидери, бидејќи токму така се зацврстува нејзиниот престиж и влијание, така Американци и Бугари се поврзуваат преку заемна почит“, изјави тој.

„Вистинскиот патриотизам е способноста да работиш заедно, да го цениш ближниот и да ја зајакнуваш довербата во заедницата. А во една заедница нема ‘поголеми’ и ‘помали’ родољупци. Навистина достојни се луѓето кои градат мостови и ги уриваат ѕидовите на поделбата. Наша должност е да бидеме меѓу оние што градат мостови по кои ќе поминат оние што доаѓаат по нас“, посочи тој.

Обраќање имаше и ковчежничката на округот Кук Марија Папас. По церемонијата за подигнување на знамето, таа во својот кабинет им врачи сертификати „Certificate of Excellence“ на лидери на бугарската заедница.

Оваа година е особено значајна, бидејќи се навршуваат 150 години од Априлското востание и од саможртвата на Христо Ботев.

Истакнувањето на бугарското знаме во Чикаго за Трети март е продолжение на една веќе долгогодишна традиција, чија основа е поставена во 1960 година, кога група бугарски емигранти се сретнува со тогашниот градоначалник на градот Ричард Џеј Дејли. Делегацијата му раскажува на градоначалникот за бугарската историја, при што посебно внимание посветува на петвековното османлиско ропство и на неправедно нарушениот, на штета на Бугарија, Санстефански мировен договор.

Импресиониран од историјата на бугарскиот народ, градоначалникот започнува кампања во поддршка на бугарската кауза, а две години подоцна гувернерот на државата Ото Кернер потпишува специјална прокламација со која 3 март се прогласува за бугарски ден и официјален празник на територијата на државата Илиноис.

Традицијата била обновена во 2007 година и продолжува да се одржува.