(Видео) Царицата Елеонора – „белиот ангел“ на Бугарите

Елеонора Каролина Гаспарина Луиза Ројс цу Кјостриц, родена во 1860 година во германско аристократско семејство, останува запаметена како една од најпосветените личности во бугарската историја, пишува Актуално. Воспитана во духот на дисциплина, религиозност и должност, таа уште во младоста се насочила кон хуманитарна работа како милосрдна сестра, инспирирана од примерот на Флоренс Најтингел.

Во Бугарија доаѓа по бракот со кнезот Фердинанд I во 1908 година, по смртта на кнегињата Марија Луиза. Наместо да остане само дворска фигура, Елеонора се посветила на добротворни и социјални каузи. Таа го поддржувала Бугарскиот Црвен крст, помагала во грижата за деца со попреченост и вложувала лични средства во институции за глуви и слепи деца, како и во санаториум за деца со белодробни заболувања.

Најсилно нејзиниот морален лик се покажал за време на Балканските војни, кога заминала на фронтот како милосрдна сестра. Работела во болници и пунктови за помош, организирала поддршка и поттикнувала обука на „милосрдни сестри“. Во народната меморија останала како „белиот ангел“ – царица која не ја гледала војната оддалеку, туку ги споделувала нејзините последици.

Во истиот период таа го врачила знамето на Македонско-одринското ополчение, симболично поврзувајќи се со националната кауза. Елеонора починала во 1917 година, за време на Првата светска војна, и по сопствена желба била скромно погребана во дворот на Бојанската црква. Иако по 1944 година споменот за неа бил потиснат, нејзината хуманост и посветеност продолжуваат да сведочат за живот посветен на бугарскиот народ.