(Видео) Изложба во Букурешт ја покажува убавината на традиционалните носии на банатските Бугари во Романија

Во Музејот на романскиот селанец во Букурешт до 17 август може да се разгледа изложба на традиционални носии на банатските Бугари од селата Винга и Дудешти Веки (Стар Бешенов) во Романија, јавува БТА. Експонатите се дел од приватната колекција на Емилијан Мадоша, а куратор е музеографот Хорациу Силвиу Иља.

Изложбата претставува 12 костими – десет женски и два машки, изработени рачно во периодот меѓу двете светски војни. Носиите се богато украсени со злато, сребро, мониста и панделки, а некои женски костими тежат и до 20 килограми.

„Овие носии се уникатни, вистински уметнички дела кои не се наоѓаат во други музеи во Романија,“ истакна директорот на музејот Вирџил Штефан Никулеску на отворањето.

Носиите се симбол на идентитетот на малата, но силна заедница на банатските Бугари, кои и денес ги носат за Велигден и на други христијански празници.