Вучиќ ги нарече “бандити и терористи” луѓето што протестираат против режимот во Србија, ја вмеша и Македонија

Српскиот претседател Александар Вучиќ изјави дека државата е во голема опасност, обвинувајќи дека „банди ја загрозуваат демократијата и секој човек во земјата“. Неговиот коментар дојде по уште една ноќ на масовни протести против неговиот режим во десетици градови низ Србија, пренесе БГНЕС.

Вучиќ говореше за, како што ги нарече, „ужасните настани во Ваљево, ужасните случувања во Нови Сад и нешто помалку ужасните во Белград“.

„Чудно е што не се зборуваше за правда кога 16 лица изгореа во пожари во Нови Сад – по вина на локалните лидери. Зошто не слушнавме кога тоа се случи во Северна Македонија? Зошто слушнавме само во Србија? Затоа што тоа беше искористено како оружје во борбата против независната и слободна држава,“ рече Вучиќ, додавајќи дека и покрај тоа што не е сосема јасно што точно се случило, мора да има правда за жртвите.

Тој ги обвини демонстрантите дека не бараат правда, туку нападнале и членови на семејствата на жртвите. Освен тоа, зборуваше и за образованието: „Децата денес учат многу помалку, знаат многу помалку. Не ги разбирам родителите кои го жртвуваат образованието на децата за свои политички цели,“ нагласи српскиот претседател.

Вучиќ исто така обвини дека „медиумски платформи сакаат да ја уништат Србија“. „Прашањето е кога ќе убијат некого – тоа е единственото што останува, откако веќе направија сè друго. Она што се случи во Ваљево и Нови Сад е чист тероризам,“ изјави тој.

Според него, во следните денови ќе има „изненадувачки одлуки и решителни потези“. „Ќе изгледа како да сме се повлекле, но потоа ќе употребиме сè што имаме за да воспоставиме мир и ред. Ќе се спротивставиме на секој надворешен притисок,“ порача Вучиќ.