Белата куќа го претстави тимот што ќе го придружува претседателот на САД Доналд Трамп на средбата во Алјаска
Белата куќа денеска го објави списокот на високи американски функционери кои ќе го придружуваат претседателот Доналд Трамп на долгоочекуваната средба со рускиот претседател Владимир Путин во Алјаска, јавува БНР.
Меѓу нив се државниот секретар Марко Рубио, министерот за финансии Скот Бесент, министерот за трговија Хауард Лунтик, специјалниот пратеник Стив Виткоф и директорот на Централната разузнавачка агенција (ЦИА) Џон Ратклиф. Во делегацијата ќе бидат и портпаролката на Белата куќа Каролајн Левит, шефицата на кабинетот Сузи Вајлс и заменик-шефот на кабинетот Дан Скавино.
Според NBC News, Трамп ќе го пречека Путин со црвен килим на воената база „Елмендорф-Ричардсон“ и лично ќе го поздрави при неговото пристигнување. Американски официјални лица наведуваат дека Трамп не планира да разговара со европски лидери или со украинскиот претседател Володимир Зеленски пред почетокот на денешната средба, но не ја исклучуваат можноста тоа да се промени за време на седумчасовните разговори.
Трамп, кој веќе го напушти Вашингтон и е на пат кон Алјаска, пред поаѓањето на својата платформа Truth Social напиша: „ВИСОКИ ВЛОЖУВАЊА!!!“. Средбата со Путин е закажана за 15:00 часот по источен американски временски појас, а можно е по неа двајцата лидери да одржат заедничка прес-конференција.
Според распоредот објавен од Белата куќа, Трамп ќе замине од Анкориџ во 21:45 часот по источен американски временски појас и ќе се врати во Белата куќа во сабота во 04:35 часот.
