Бугарија со прв завод за биоетанол – инвестиција вредна 56 милиони евра

Бугарија влегува на светската мапа на производители на обновливи горива со изградбата на првиот завод за биоетанол во земјата. Инвестицијата ја реализира нафтената компанија „Инса оил“, која во Пловдивско го гради индустрискиот комплекс „Инса Спирит“ во вредност од 56 милиони евра.

Заводот се простира на 45 илјади квадратни метри и е еден од најмодерните на Балканот. Проектот предвидува современи производствени капацитети, лабораторија сертифицирана по меѓународни стандарди и зелени површини околу комплексот. Технологијата е развиена од индиската компанија PRAJ, а во изградбата се вклучени водечки светски индустриски фирми како BÜHLER, ALFA LAVAL, BOSCH, SIEMENS и SOLAR TURBINES.

Дневниот капацитет ќе изнесува 41 илјада литри етилов алкохол, дел од кој ќе се преработува во биоетанол за бугарскиот пазар. Како нуспроизводи ќе се добиваат високопротеинска храна за сточарството и втечнет јаглерод диоксид за прехранбената индустрија.

Од 2025 година Бугарија воведе задолжителна примеса од најмалку 9% биоетанол во бензинот, во согласност со европските зелени политики.

„Инса Спирит“ треба да почне со работа во втората половина на 2026 година и ќе отвори 120 нови работни места. Во втората фаза е планирано производство на биоетанол од биомаса, што ќе ја позиционира Бугарија како регионален фактор во обновливата енергетика.