Радев: Бугарија е во центарот на политичкиот разговор за иднината на Европа

Бугарија не е ниту на периферијата ниту во изолација, туку е во центарот на политичкиот разговор за економската перспектива и одржливоста на Европа, изјави премиерот Румен Радев на почетокот на денешната седница на бугарската Влада, јавува БГНЕС.

Тој потсети дека претседателката на Европската комисија Урсула фон дер Лајен, во годишното обраќање за состојбата на Европската унија, ја најавила иницијативата за меѓуконтинентална поврзаност и ја посочила Бугарија како домаќин на идна средба на врвот.

Според Радев, претстојната средба за поврзување на Европа со Централна Азија и Блискиот Исток е „израз на доверба“ кон бугарската влада и нејзините иницијативи.

Премиерот оцени дека Бугарија има можност својата географска положба да ја претвори во стратешка предност. Тој додаде дека владата работи со Европската комисија за промена на статусот на бугарските стратешки инфраструктурни проекти, со цел тие да станат дел од европската транспортна, енергетска и дигитална мрежа за поврзаност.

Според него, реализацијата на овие проекти е важна за забрзување на економскиот раст, справување со демографските проблеми и модернизација на земјата.