Бугарија гради научен центар од светско ниво за истражување на ракот и ретките болести

Бугарија доби 30 милиони евра од Европската Унија за изградба на Центарот за биомедицински истражувања и технологии (BioMedRTC), кој ќе ги истражува молекуларните механизми на ракот и ретките болести, објави bTV. Координатор на проектот е Институтот за молекуларна биологија при Бугарската академија на науките (БАН).

Научните тимови веќе работат, а во следните месеци ќе започне регрутирањето млади научници. Центарот ќе има сопствена зграда, која се очекува да биде готова во рок од две години и да биде опремена со современи микроскопи и друга научна апаратура.

„За тема ги избравме ретките заболувања и ракот. Не станува збор за клинички истражувања или работа со пациенти, туку за истражување на молекуларните механизми на овие заболувања“, изјави Михаил Саров од Институтот за молекуларна клеточна биологија и генетика „Макс Планк“ во Дрезден.

Центарот ќе ги поврзе технологиите од молекуларната и клеточната биологија со пристапи од математиката и физиката. Целта е подобро разбирање на овие заболувања и придонес кон развојот на нови дијагностички и терапевтски методи.

Предвидено е научниците да разменуваат искуства и знаења и да добиваат менторска поддршка од истражувачи од институтите „Макс Планк“ во Дрезден и „Кири“ во Париз.

Центарот треба да обезбеди услови за самостојна истражувачка работа на млади научници и да го зајакне придонесот на Бугарија во европските научни истражувања.