Бугарија и Романија градат центар за поморска безбедност во Црно Море

Европската Унија работи на зајакнување на безбедноста во Црното Море и по реката Дунав преку рано откривање закани, размена на информации во реално време и побрза координација при сериозни инциденти, изјави високиот претставник на ЕУ за надворешна политика и безбедност Каја Калас, јавува БГНЕС.

Таа ја посочи мрежата MARSUR на Европската агенција за одбрана, преку која земјите членки можат да разменуваат податоци од поморскиот надзор.

„Центарот за поморска безбедност во Црното Море, кој Романија и Бугарија го создаваат заеднички со поддршка на ЕУ, дополнително ќе го подобри следењето на состојбата“, изјави Калас.

Предложениот вонреден протокол предвидува итни политички консултации и подобра координација при големи хибридни кризи, вклучително и со НАТО.

ЕУ работи и на заеднички развој и набавка на одбранбени средства, вклучително и преку коалиција во областа на дроновите. Иницијативата Eastern Flank Watch е насочена кон засилен надзор и одбрана од Балтичкото до Црното Море во тесна координација со НАТО.

Преку Европската агенција за одбрана, земјите соработуваат и на нова генерација средства за противминско дејствување и беспилотни поморски системи.