Бугарија ја потврди силната поддршка за европската интеграција на Украина
Бугарскиот премиер Росен Желјазков, во видеоконференциски разговор со украинската премиерка Јулија Свириденко, ја потврди активната и принципиелна поддршка на Бугарија за европската интеграција на Украина, заснована на заслугите на самата земја, јавува БГНЕС.
Желјазков ја поздрави посветеноста на Украина кон спроведување на клучните реформи поврзани со Европската унија, особено во контекст на актуелните геополитички предизвици и продолжената руска агресија. Тој истакна дека иднината на Украина е во ЕУ и дека европската интеграција претставува гаранција за стабилност и просперитет во целиот регион.
Бугарија ја поддржува одлуката за отворање на првиот преговарачки кластер, при што премиерот нагласи значењето на украинскиот акциски план за националните малцинства како суштински елемент за започнување на првата преговарачка глава.
Во разговорот, Желјазков ја потврди непоколебливата поддршка на Бугарија за Украина во контекст на војната, истакнувајќи ја важноста на меѓународните напори за постигнување трајно решение. Тој го поздрави ангажманот на администрацијата на американскиот претседател Доналд Трамп во насока на прекин на руската агресија, нагласувајќи дека преговорите мора да се темелат на принципите на правда, суверенитет и безбедносни гаранции.
Премиерот изрази и подготвеност Бугарија да се вклучи во процесот на обновување, реконструкција и реформи во Украина по завршување на конфликтот. Дополнително, беа разгледани прашања од областа на регионалната енергетска безбедност и транспортната поврзаност.
На средбата учествуваше и бугарскиот министер за надворешни работи, Георг Георгиев.
