Бугарија ќе соработува со Романија и Турција за поморска безбедност, поддржана Париската декларација за мир во Украина

Бугарија, согласно одлука на Народното собрание, ќе учествува во доменот „Поморска безбедност“ заедно со Романија и Турција, во зоните каде што веќе дејствува со противминската група. Учеството ќе биде „во сферите во кои земјата има капацитет и потенцијал да придонесе за заедничката европска безбедност“, изјави премиерот Росен Желјазков по средбата на Коалицијата на подготвените во Париз, јавува БГНЕС.

На состанокот учествуваа лидери и претставници на 35 држави, европските институции и НАТО, како и претставници на САД. Разговорите беа насочени кон постигнување траен и одржлив мир во Украина и обезбедување безбедносни гаранции за Украина и Европа.

Лидерите се обединија околу т.н. Париска декларација, која ја поставува рамката за заеднички европски и партнерски напори за „праведен и траен мир“, вклучително и механизми за верификација на мировните договори и јакнење на отпорноста на украинските вооружени сили „за одвраќање и заштита по постигнувањето на мир“.

„Бугарија ги поздравува напорите за прекин на огнот и за одржлив мир, но праведен мир не смее да биде фалшив“, нагласи Желјазков, додавајќи дека оваа позиција јасно е истакната во усвоената декларација.