Бугарскиот премиер Радев: Нашите врати се широко отворени за германскиот бизнис
Германските инвестиции се двигател на индустрискиот развој на Бугарија и внесуваат успешни деловни модели во економијата. Затоа вратите на Бугарија се широко отворени за германскиот бизнис. Ова го изјави премиерот на Бугарија, Румен Радев, на средбата со делегација на Источниот комитет на германската економија, пренесува 24 Часа.
Бугарскиот премиер ги истакна достигнувањата на Бугарија во роботиката, мехатрониката, електрониката и другите високотехнолошки производства, кои создаваат можности за реализација на успешни заеднички проекти.
Румен Радев ги нагласи предностите на Бугарија како инвестициска дестинација, меѓу кои се стабилноста, гарантирана од актуелната влада, како и стратешката положба на земјата, која е крстопат на бројни енергетски, дигитални и транспортни коридори.
„Бугарија не може да биде заобиколена кога зборуваме за поврзаноста меѓу Европа и Азија и меѓу Европа и Блискиот Исток“, истакна Радев. Премиерот ја нагласи и улогата на земјата во енергетската безбедност на регионот, како и добро избалансираниот енергетски микс на Бугарија, вклучувајќи го растечкиот капацитет за складирање енергија.
Силниот екосистем во областа на информатичките технологии е уште една предност на Бугарија, според премиерот.
„Располагаме со квалификувани и добро подготвени стручњаци кои можат да работат во индустриите на иднината“, посочи Румен Радев.
Тој ги нагласи и активните мерки на владата за подобрување на инвестициската клима преку поедноставување на административните постапки и забрзување на работата на институциите.
Премиерот го истакна и новиот пристап кон јавно-приватното партнерство, преку кое исто така може да се развива инфраструктура, а истовремено да се обезбедат квалитет, транспарентност и забрзана реализација на проектите.
