КОЛЕВ: ДО КОГА ОРИЗОПРОИЗВОДИТЕЛИТЕ ВО КОЧАНСКО ЌЕ ИМААТ ПРОБЛЕМ СО НАВОДНУВАЊЕТО И ЦЕНАТА НА ОРИЗОТ?

//

„Група на граѓани ми се обратија за проблемите со кои се соочуваат во Кочани и кочанско во врска со долгогодишниот проблем со системот за наводнување бидејќи не е ставен целосно во функција.
Иако делот со главните канали ДЕЛУМНО е среден, кочанчани имаат голем проблем со каналетите односно споредните цевки преку кои се дистрибуира водата до самите ниви. Министерот за земјоделство, шумарство и водостопанство, Трајан Димковски, на 21 јануари 2020 година, на состанокот со земјоделците и градоначалникот на Кочани Николчо Илијев, изјави дека цитирам „како ресорно министерство заедно со општина Кочани веќе ги преземавме сите потребни активности во делот на каналите за наводнување и одводнување, со цел да бидат подготвени за годинешната сезона за сеидба на ориз. Очекуваме за една недела да се објави јавна набавка со која за подржуниците на АД Водостопанство, меѓу кои е и подружницата во Кочани, ќе се направи една голема набавка во вредност од 50 милиони денари, со којашто ќе ги обезбедиме потребите на подружниците за резревни делови, градежни материјали и се друго што им е потребно, со цел целокупниот систем за наводнување да биде ставен во функција, за новата сезона за сеидба на ориз“.

Но како и обично наназад 30 години ветувањата или се само празни зборови или не се исполнуваат во целост.
Каналетите се во мизерна состојба, стари, уништени и неисчистени. Иако за ова одговорни се АД Водостопанство-Кочани, сепак оризопроизводителите сами се принудени да ги одржуваат колку што можат овие каналетки. Прашањето е ако навистина се обезбедиле средства, како што изјави министерот а потврди градоначалникот, зошто не е се сработено во целост иако сезоната за оризот е веќе почната? Што се чека?

Друг огромен проблем со кој се соочуваат оризопроизводителите се и вработените водари- луѓе кои треба да се одговорни за количеството на вода која се испушта по нивите. И покрај другите грижи, земјоделците се оставени сами на себе да го контролираат количеството на вода, иако има луѓе кои што земаат плата и се одговорни за овој дел. Поради ова често пати доаѓа и до големи меѓусебни несогласувања помеѓу оризопризводителите.

Поради овие причини многу млади кои што се одлучиле да станат земјоделци полека се откажуваат и својата егзистенција ја гледаат насекаде само не во своите родни места. Младите се повеќе се иселуваат. Дали г-да од власта и сите вие наназад 30 години, на овој начин се грижите за нашите земјоделци? Вака ли ги мотивирате и овој ли е вашиот начин да ги задржите младите? Кога ќе престане тоа ваше ЌЕ? Градот на оризот е апсолутно запоставен. Наместо да манипулирате време е проектите што ги пишувате во предизборните кампањи да ги завршите во целост. Кочанскиот ориз е еден од нашите македонски обележја. Ако повторно ги разочарате земјоделците и не им дадете никаква мотивација, помош и поддршка, и не си ги исполните ветувањата за кои ве избрале, дефинитивно сите ќе се откажат а со тоа не губи само економијата тука и општеството во целост.

И за крај најважното, до каде сме со години наназад ветуваните 70 до 80 денари по килограм откупна цена на оризот?“, напиша на својата официјална Facebook страна Петар Колев, претседател на ГДУ.





Претходна статија

ГРУБИ: ТОА ШТО ЌЕ ГО НАУМИ ДУИ ЌЕ СЕ ОСТВАРИ

Следна статија

ЛИДЕРОТ НА СИНДИКАТОТ НА ПОЛИЦИЈАТА ВО МИНЕАПОЛИС: ЗАПОМНЕТЕ ЈА КРИМИНАЛНАТА ИСТОРИЈА НА ФЛОЈД

Најново од Вести