Проф. д-р Радостина Стојанова од БАН ја доби Големата награда „Питагора“ за целосен придонес во науката
Проф. д-р Радостина Стојанова од Институтот за општа и неорганска хемија при Бугарската академија на науките е добитничка на Големата награда „Питагора“ за целосен придонес во науката, јавува БНР. Признанието беше врачено на свечена церемонија во Националниот историски музеј, која ја отвори министерот за образование и наука Красимир В’лчев.
Наградата „Питагора“ се доделува веќе 17-та година по ред и ги истакнува најуспешните бугарски научници. Во овогодинешното издание, во осум категории конкурираа 52 истражувачи.
Проф. Стојанова е наградена за своите пионерски истражувања во хемијата на материјалите за чисто и достапно складирање на енергија. Нејзините научни трудови се цитирани повеќе од 5000 пати, а има Хирш индекс 42. Таа доби почесна грамота и парична награда во износ од 12.000 лева.
Во категоријата „Комуникација на науката“ наградата ја доби проф. Христо Пимпирев од Софискиот универзитет „Св. Климент Охридски“, основач и водач на бугарските поларни истражувања.
Проф. Христијан Александров беше награден како истакнат научник во областа на природните и инженерските науки, а проф. Красимира Јончева од Медицинскиот универзитет во Софија – во областа на медицината и науките за живот, за своите иновативни истражувања на наночестички со антитуморно дејство.
Проф. Станислав Иванов од Високото училиште по менаџмент во Варна доби признание за своите трудови поврзани со економските и социјалните аспекти на вештачката интелигенција и автоматизацијата.
Меѓу младите научници кои ја добија наградата се доц. д-р Мартин Ралчев од Институтот за роботика при БАН, гл. ас. д-р Емилио Матеев од Медицинскиот универзитет во Софија и гл. ас. д-р Меги Дакова од Пловдивскиот универзитет „Паисиј Хилендарски“. Тие се наградени за достигнувања во роботиката, фармацевтската хемија и за истражувања поврзани со врската меѓу науката, високото образование и бизнисот.
