Јотова: Првата седница на бугарскиот парламент најверојатно ќе биде свикана следната недела
Бугарската претседателка Илијана Јотова изјави дека најверојатно следната недела ќе биде првата седница на новиот парламентарен состав во бугарското Народно собрание. Тоа треба да се случи по официјалното објавување на изборните резултати и имињата на 240 избрани пратеници. Јотова се обрати при отворањето на изложбата „За слободата на еден народ“ по повод 150-годишнината од Априлско востание во Национална библиотека „Св. св. Кирил и Методиј“.
Шефицата на бугарската држава посочи дека рокот за објавување на резултатите од Централна изборна комисија е до 26 април, со очекување процесот да заврши порано.
Таа им честиташе на граѓаните за учеството на изборите.
„Луѓето поверуваа дека Бугарија може да има нормални, транспарентни и добро организирани избори“, изјави Јотова, додавајќи дека повисоката излезност е резултат и на напорите на институциите, вклучително и Министерството за внатрешни работи, за спречување изборни нерегуларности.
